फाउंडेशनविषयी

प्रभा करपे यांचे बालपण कोल्हापूरमध्ये गेले. प्रिन्सेस पद्मराजे गर्ल्स हायस्कूलमध्ये शिक्षण घेऊन त्यांनी द न्यू कॉलेज, कोल्हापूर येथून अकाउंटिंग व ऑडिटिंगमध्ये M.Com पूर्ण केले. पुण्यात आल्यानंतर खराडी हे त्यांचे घर आणि कर्मभूमी बनले.

रेसिडेंट वेलफेअर खराडीच्या अध्यक्षा म्हणून त्या अनेक वर्षांपासून वेगाने वाढणाऱ्या या IT उपनगरातील रोजच्या प्रश्नांवर काम करत आहेत — पाणीपुरवठा आणि टँकरवरचे अवलंबित्व, ड्रेनेज व पूरस्थिती, रस्ते व आरक्षित भूखंडांवरील अतिक्रमण, मॉडिफाइड सायलेन्सरचा आवाज, कचरा जाळणे आणि महिला व ज्येष्ठ नागरिकांची सुरक्षितता.

त्यांची पद्धत संयमी आणि व्यवहार्य आहे — विषयाचा व नियमांचा अभ्यास, संबंधित विभागाला लेखी पत्र, अधिकाऱ्यांशी संवाद आणि काम पूर्ण होईपर्यंत पाठपुरावा. त्यांच्या शब्दांत, प्रशासनाला जाब विचारणे हा प्रत्येक नागरिकाचा अधिकार आहे; पण कामे होतात ती अभ्यास, लेखी पाठपुरावा आणि संवादातून.

हेच काम वस्तीतील मुले, एकल माता, वयोवृद्ध पालक आणि संकटातील कुटुंबांपर्यंत नेण्यासाठी त्यांनी 2022 मध्ये प्रभा करपे फाउंडेशनची (नोंदणीकृत नाव: PRABHA KARPE FOUNDATION, सेक्शन 8 ना-नफा कंपनी) स्थापना केली. खराडीतील PMC वारकरी हॉलमध्ये वारकऱ्यांच्या वार्षिक सेवेचेही त्या नेतृत्व करतात — यंदा या सेवेचे बारावे वर्ष.